Pro 4 | WSK | STEP | Aga kuriang alo, nedegewa tagiral ale ani nenenga nenet den balsam mu ninguru ikialko, ale te ikia nunguning talko.

Proverbs 4

Ikia nunguning mu mel gira nunguningkiri

1 Aga kuriang alo, nedegewa tagiral ale ani nenenga nenet den balsam mu ninguru ikialko,
ale te ikia nunguning talko.
2 Den ani ninga manorsam mu nunguningta,
se nibiring ko me beteralko.
3 Tom ani gotektir la aga ba ko kawam te,
mu ani angimik launuria mena, am agata suwan aga ayam aga iluwam.
4 Se aga ait mu ikia nunguning aga kasurukaso, ale iwita balukaso,
“Den ani ka manorsam imi gemang ningi bitar ale ninguru karo tuiko, umutang te ni yawarakala bagerko.
5 Ikia nunguning ninguru toko.
Den suen la ka manorsam imi me biring tui ale me ko kamili sapurukko.
6 Ni ikia nunguning me biring tuiko. Mena.
Ko kuarko, se nu yawarakala ka sinar taukko.
7 Ikia nunguning mu mel gira nunguningkiri.
Buta se ikia nunguning ninguru toko.
Anapeya mel ni gisam, bare ikia ningo mu ninguru toko.
8 Ikia nunguning ko kuar se nup biya kisokko,
ilukuawur se nup ningo kisokko.
9 Nu tam sisik yawara mayang te mungumura ale sipiling te betera se anira iwita anirukko.”

10 Aga kuriang, aninga den ninguru iki ale te tom maiya biya ali imi te bagerko.
11 Ani ni ikia nunguning karo tuiko wore ka kasursam,
ale lage ningo te namarko wore te ka diruwusam.
12 Se lage imitang te aolak ilup, bare manga mel bo siwik te me sorurukko.
Ale nagur, bare mel bo te siwik atum ale me dagulko.

13 Ni tom suen biya aninga den ningo ka manem mu ilukuawurko.
Mu awuk, mu bagara yawara te arikko, se ninguru ko sinar toko.
14 Ale kari memek nunga lage mu me karo,
ale arungu nunga munan memek mu me bitarko.
15 Ni lage memek mu kier ale tagi to awar biya bagerko.
16 Kari memek alo mu kilek memek me betemon, mu me ta taga animonko,
am marak loaga gurugu lagomonko,
nama kari bo memek te betemon mu asele kowo.
17 Kilek memek tere daong betera mu nononga yu inang yawara iwita.

18 Kariimet munan diram karo tuiwara,
mu nunga lage mu sor ukirokko worem duap diruwuso se sor nikim pagoso,
ale worem nama dirmaso se sor suen la nikim biyala kaposo iwitata.
19 Bare kariimet ikia munan memek bitawara,
mu nunga lage mu sor tiromorom biya iwita,
se nuna anapeya mel nusuwik atumuso mu me arigisan ale ko ikisan.

20 Aga kuriang, degewa tagir ale den balsam mu ninguru ikiko.
21 Ale gemang motam ningi bitar ale ninguru ilukuawurko.
22 Mu awuk, ni te marak toko ale kuera ikes bo me arikko.
23 Mel gira nunguningkiri mu iwita: ka gemang motam ninguru ko sinar toko.
Mu awuk, ka bagara aolak suen biya te ikia kisok se te bagerko.
24 Ni den kawel me ta baluko.
Ale den memek kiring te me aratukko.
25 Nika motam lage te namarko umutang la diram arikuawurko,
me ngual ngual loagerko.
26 Anapeya bitarko mu gir ale ninguru ko ikia to mu asele bitar,
se diram la nama aratukko.
27 Lage ningo karowasam borta la diram karoko,
lage ngas ko karo, sengam ko karo, iwita me negerko.
Ni kilek memek suen la biring tuiko.